സ്പൊക്കേൻ മിഷൻപള്ളി അസി.വികാരി ഫാ. ആന്റണി ക്രീച്ച് അന്തരിച്ചു
വാഷിംഗ്‌ടണ്‍ : സ്പൊക്കേൻ സെന്റ് ഗ്രിഗോറിയോസ് ഓർത്തഡോക്സ് മിഷൻ പള്ളി അസി. വികാരി ഫാ.ആന്റണി ക്രീച്ച് അന്തരിച്ചു. വളരെക്കാലമായി രോഗങ്ങളോട് മല്ലിട്ടു കഴിഞ്ഞ ഫാ. ആന്റണി,ശനിയാഴ്ച രാവിലെ 6.30 നാണ് അന്തരിച്ചത്. മലങ്കര ഓർത്തഡോക്സ് സഭ സൗത്ത് വെസ്റ്റ് അമേരിക്കൻഭദ്രാസനത്തിലെ സ്പൊക്കേൻ പ്രദേശത്തെയും ഇടവകാംഗങ്ങളെയും സംബന്ധിച്ചിടത്തോളം ഫാ. ആന്റണിയുടെ സാന്നിധ്യവും നിസ്വാർഥസേവനവും ഏറെ വിലപ്പെട്ടതായിരുന്നു.
സംസ്കാര ശുശ്രൂഷകൾ നോർത്ത് ഈസ്റ്റ് അമേരിക്കൻ ഭദ്രാസന അധ്യക്ഷൻ സഖറിയാ മാർ നിക്കോളോവോസ് മെത്രാപ്പൊലീത്തയുടെ കാർമികത്വത്തിൽ തിങ്കളാഴ്ച നടന്നു. 1944ൽ ന്യൂയോർക്കിൽ ജനിച്ച ആന്റണി ഐഡഹായിലെ ലെവിസ്റ്റണിലാണ് വളർന്നത്. പിന്നീട് സ്പൊക്കേൻ പ്രവർത്തന കേന്ദ്രമാക്കി.
മലങ്കര ഓർത്തഡോക്സ് സഭയുടെ ലിറ്റർജിക്കൽ പാരമ്പര്യത്തിൽ ആകൃഷ്ടനായ ഫാ. ആന്റണി, കാലംചെയ്ത ഡോ. തോമസ് മാർ മക്കാറിയോസ് മെത്രാപ്പൊലീത്തയുടെ ആശീർവാദങ്ങളോടെ യാണ് 2002 ൽസഭയിൽ ചേർന്നത്.അന്നു മുതൽ സ്പൊക്കേൻ സഭയിൽ ഇദ്ദേഹം വൈദികനായി പ്രവർത്തിച്ചുവരികയായിരുന്നു. ആത്മാർഥതയും അർപ്പണമനോഭാവവും കൈമുതലായുള്ള ഫാ. ആന്റണി ഇടവക ജനങ്ങളുടെ ഏതൊരാവശ്യത്തിലും മുന്നിൽ നിന്നു പ്രവർത്തിച്ചിരുന്നു. സ്പൊക്കേൻ സെന്റ് ഗ്രിഗോറിയോസ് മിഷൻ പള്ളി വികാരി വെരി. റവ. ഫാ. മിഖായേൽ ഹാച്ചർ കോർ എപ്പിസ്കോപ്പാ സംസ്കാരചടങ്ങുകൾ ഏകോപിപ്പിക്കുന്നതിന് നേതൃത്വം നല്‍കി.
