കോലഞ്ചേരി പള്ളി മദ്ബഹയിലെ പുരാതന ചിത്രത്തിനു പുനർജനി

കോലഞ്ചേരി: – കോലഞ്ചേരി പള്ളിയുടെ മദ്ബഹയിലെ 150 വർഷത്തിനു മുകളിൽ പഴക്കമുള്ള ചിത്രം പുനർജനിക്കുന്നു. പഴയ പള്ളിയിൽ ഉപയോഗിച്ചിരുന്ന ചിത്രം പള്ളി പുതുക്കിയപ്പോൾ അതിലേക്കു മാറ്റി പ്ലാവിൻ പലകയിൽ വരച്ചു ഭിത്തിയിൽ ഉറപ്പിച്ച നിലയിലാണ് ചിത്രം. വിശുദ്ധ പത്രാസ്, പൗലോസ് ശ്ലീഹൻമാരുടെ ചിത്രത്തിൻ്റെ അരികുകളിലും വസ്ത്രത്തിൻ്റെ കസവുകളിലും ശിരസ്സിന് മുകളിലുള്ള പ്രഭാവലയത്തിലും സ്വർണ്ണ നിറത്തിൽ ഇലകളുണ്ടായിരുന്നു. 1963 ൽ പള്ളി പെയിൻ്റടിച്ചപ്പോൾ ഈ ഇലകൾക്കു മുകളിലും ചായം തേച്ചു. പാശ്ചാത്യരുടെ മുഖഛായയാണ് ചിത്രത്തിൽ. അക്കാലത്തു കേരളം സന്ദർശിച്ച ഏതെങ്കിലും വിദേശി വരച്ചതാവാം എന്നും കരുതുന്നു. നീല. ചുവപ്പ്, തവിട്ടു നിറങ്ങൾ വിദേശികൾ കൂടുതലായി ഉപയോഗിക്കുന്നതാണ്.
ചിത്രത്തിൻ്റെ ചരിത്രപ്രാധാന്യം മനസ്സിലാക്കിയ വികാരി ഫാ.ജേക്കബ് കുര്യൻ ചെമ്മനവും മറ്റു പള്ളി ഭാരവാഹികളും അതിൻ്റെ നവീകരണ ചുമതല കോഴിക്കോട് സ്വദേശി ജിജുലാൽ കുന്നത്തിനെ ഏൽപിച്ചു. ചിത്രത്തിനു മുകളിൽ അടിച്ച പെയിൻ്റ് നീക്കം ചെയ്യലായിരുന്നു ആദ്യ ജോലി. ഇതിനൊപ്പം കറയും കരിയും നീക്കി. അടർന്നുപോയ പെയിൻ്റ് പാളി ഉറപ്പിച്ചു. അടർന്ന ഭാഗങ്ങൾ ബോണ്ടിങ്ങ് പൗഡർ ഉപയോഗിച്ചു യോജിപ്പിച്ചു. ചിത്രത്തിനു പുതിയ കോട്ടിങ്ങ് നൽകി പ്രകൃതിദത്ത നിറങ്ങൾ ഉപയോഗിച്ച് റീ ടച്ചിങ്ങ് നടത്തിയാണു ചിത്രം 150 വർഷം മുന്നത്തെ അതേ പകിട്ടോടെ പുനർജനിച്ചത് . ചിത്ര പുനരുദ്ധാരണം അടുത്ത മാസം ആദ്യം പൂർത്തിയാവും. ഈ ചിത്രത്തിനു പുറമേ യേശുവിൻ്റെ ജനനം മുതൽ മരണം വരെയുള്ള 14 മുഹൂർത്തങ്ങളുടെ ചിത്രവും മദ്ബഹയിലുണ്ട്.