യു.എസില്‍ മാത്യൂസ് മാര്‍ ബര്‍ണബാസ് മെത്രാപ്പോലീത്തായുടെ ഓര്‍മ്മപ്പെരുന്നാള്‍ ആചരിക്കുന്നു
ന്യുയോർക്ക് : മലങ്കര ഓർത്തഡോക്സ് സഭയുടെ മുൻ അമേരിക്കൻ ഭദ്രാസനാധ്യക്ഷൻ മാത്യൂസ് മാർ ബർണബാസ് മെത്രാപ്പൊലീത്തയുടെ നാലാം ഓർമ്മപെരുന്നാൾ ഡിസംബർ 8 വ്യാഴാഴ്ച ആചരിക്കുന്നതായി നോര്‍ത്ത്-ഈസ്റ്റ്‌ ഭദ്രാസന മെത്രാപ്പൊലീത്ത സഖറിയാ മാർ നിക്കോളോവോസ് കൽപനയിലൂടെ ഇടവകകളെ അറിയിച്ചു.
വലിയ തിരുമേനിയുടെ അനുസ്മരണ ശുശ്രൂഷകൾ ന്യുയോർക്ക് ലോംഗ് ഐലൻഡിലെ സെൻറ് തോമസ് ഓർത്തഡോക്സ് പളളിയിൽ(110 School House Road, Levittown, New York) സന്ധ്യാ നമസ്കാരത്തോടെ വൈകുന്നേരം 6.30ന് ആരംഭിക്കും. തുടർന്ന് വി. കുർബാനയും പ്രാർഥനയും നടക്കും. ഭദ്രാസനത്തിലെ എല്ലാ ഇടവകകളും വലിയ തിരുമേനിയുടെ ദുക്റോനോ ഡിസംബർ 11ന് ഞായറാഴ്ച ഭക്ത്യാദരപൂർവ്വം ആചരിക്കണം.
വിവരങ്ങൾക്ക് : ഭദ്രാസന സെക്രട്ടറി ഫാ. എം. കെ. കുറിയാക്കോസ്, വെരി. റവ. യോഹന്നാൻ ശങ്കരത്തിൽ കോർ എപ്പിസ്കോപ്പ(സെന്റ് തോമസ് ചർച്ച് വികാരി), ഫാ. ഏബ്രഹാം(എബി) ജോർജ് (സെന്റ് തോമസ് ചർച്ച് അസി. വികാരി) എന്നിവരെ സമീപിക്കുക.
ഡിസംബർ 9 ന് കേരളത്തിലുളള വൈദികരും വിശ്വാസികളും തിരുമേനി അന്ത്യവിശ്രമം കൊളളുന്ന വളയൻചിറങ്ങര സെന്റ് പീറ്റർ ആൻഡ് സെന്റ് പോൾസ് പളളിയിൽ നടക്കുന്ന ശുശ്രൂഷകളിൽ പങ്കുചേരണം. വലിയ തിരുമേനിയുടെ അഞ്ചാമത് ദുക്റോനോ, ഭദ്രാസനം പുതിയതായി വാങ്ങുന്ന ഹോളി ട്രാൻസ്ഫിഗറേഷൻ സെന്ററിൽ നടത്താനാകുമെന്ന് പ്രത്യാശിക്കുന്നതായും മാർ നിക്കോളോവോസ് കൽപനയിൽ അറിയിച്ചു.
